Don Sancho, obispo de Auila, como sennor onrado, dio mui buen exemplo como faz el buen prelado, fizo este monasterio, Sant Benito llamado, et diol muy grandes algos por do el es sostentado. Puso y muchas dueñas et de muy sancta vida, dioles su abadesa, entenduda et sabida, de libros et vestimentas la eglesia muy compida, et de muchas otras ioya la fizo enriquecida. Puso y capellanes que cada dia cantasen, et las oras del dia todas muy bien rezasen, et por todos los finados cada dia rogasen, ca dioles buenas rentas con que lo bien pasasen, e por que este monesterio fuese meior guardado, e de todos sus algos fuese bien mamparado, dio la uisitacion a qualquier que fues prelado, obispo que fues de Avila, e non de otro reglado. Andaua estonce el era, quando el fue acabado, en mill et trescientos annos, segunt diz el dictado, et mas ochenta y ocho, por meior se remembrado, et dio gracias a Dios el obispo mucho onrado.

Texto dado por Rodríguez Suárez (2009, p. 321)